خليك فى النور

خليك فى النور
بصراحه انا مش فاكر التعبير ده قريته او سمعته فين
بس تعبير عميق و قوى وحلو جدا

خليك فى النور
ياترى مين بيطلب منى انى اخلينى فى النور

هل صوت الضمير جوايا
هل صوت الجو الكنسى والممارسات الروحية
ولا صوت ربنا يسوع المسيح فى ارشادالروح القدس لى ؟؟

طبعا كلنا متفقين على الاختيار التالت

ربنا هو النور
" أنا هو نور العالم

ومن فرط حبه خلانا كمان احنا اولاد النور - اولاده
" أنتم نور العالم

يبقى انا وضعى الطبيعى بيقول ان انا ابن النور يبقى اعيش فى النور

النور هو الحريه هو الشفافية والصراحه
الصراحه مع ربنا ومع النفس ومع الناس
ممكن انا اضحك على الناس ويمكن كمان اضحك على نفسى بس مش ممكن اضحك على ربنا

انا فى الضلمه
انا فى الضلمه لما سيبت النور لما سيبت المسيح
لما تركت نور الكلمه
سراج لرجلى كلامك ونور لسبيلى

انا ميت فى الضلمه
الناس زى ماقال الكتاب احبت الظلمة اكثر من النور .. لأن النور بيكشف اعمالهم الشريرة

الدكتور بيكتب الدوا للمريض والمريض باخد الدوا غصب عنه بس عارف ان الدكتور نفسه انه يخف

هى دى القضيه ربنا عاوزنا فى النور .. بس النور بالنسبه لنا صعب
لأنه شفاف اوى وحنا مش شفافين
النور صريح اوى واحنا مش صرحا
النور عميق اوى واحنا سطحيين
النور قوى جدا واحنا ضعفاء بسبب سقاطتنا
النور هو اسرع شئ فى الوجود واحنا مملين وعايشين فى بطئ وفتور وبرود
مزمع الله ان يتقيأنا

علشان كده احنا مش بنقدر نعيش فى النور

بس لحد امتى هنعيش فى الضلمه
انا خايف نتنقل من ضلمه العالم الشرير لضلمة الجحيم الأشر

انا محتاج اعيش فى النور
علشان انا فى الفردوس هبقى انسان منير
ازاى هبقى منير وانا مش متعود اعيش فى النور
ازاى هيبقى لى جسم نورانى شفاف سريع خفيف وانا هنا كسول وتقيل وممل وعايش فى الضلمة

والهموم والمشاكل والضيقات راكبه فوق كتافى والحمل تقيل
والضرب شديد
والالم موجع

بصراحه انا اللى استاهل

لأن ربنا كل يوم بيخبط على بابى ويقول
" هانذا واقف على الباب وأقرع من يفتح لى باب قلبه أدخل اليه واتعشى معه وهو معى"

ربنا كل لحظه رايدلى ان اعيش فى النور
بس انا مش واضح ومش صريح
مش عارف اذا كنت رايد اعيش فى النور ولا لأ

مرات كتير بحب النور وببقى محتاج فعلا ابقى مع ربنا
ومرات تانيه بحب الظلمة وببعد عن ربنا

ذو رايين متقلقل فى جميع طرقى

بس كفايه بقى
انا عايز اعيش فى النور
كل شئ منير
مضئ
مبهج
مفرح
مريح
معزى

النور هو ربنا
وربنا هو النور

لما اطلب انى اعيش فى النور يبقى بطلب انى اعيش فى ربنا فى حب ربنا فى حضن ربنا
بل انى بطلب ربنا نفسه

وربنا نفسه بيقدملى حبه
وهى دى النقطه اللى مشيئته الصادقه توافق مشيئتى

انا كده حر فى النور
مفيش حاجه رابطانى

مفيش روابط نفسيه
مفيش روابط عقليه
مفيش روابط مادية
مفيش روابط ارضيه

انا كده زى العصفور بتنقل من شجره لشجره ومن فرع لفرع ومن وادى لوادى

اعرف اطير واسبح فى السما وافرد جناحاتى

ما انا فى النور
مفيش حد له تاثير على
مفيش شئ له تاثير على

مش شايل هم شئ
انا زى العصفور
بل وافضل من عصافير كثيره
لا اهتم بما آكل او اشرب او البس

الله الذى يعول كل الحياة
هو يعولنى

يارب
انا محتاجك
محتاج اعيش فى النور محتاج نور الكلمة وكلام النور
محتاج الصراحة والقدسية والطهاره والشفافية
محتاج النور

يارب خلينى فى النور