خواطر إنسان بسيط ولكن....

سلام المسيح

هذه خواطر إنسان بسيط علي قد حاله.... ولكنه عميق جدا في محبته لإلهه... أنقلها لكم كما قرأتها... بنفس ألفاظها وعباراتها...

فجأة ..
سمعت صوت ربنا بيقوللى: القطة

قلت له: مالها القطة يا رب؟

قاللى: إيه رأيك فيها ؟ كائن ضعيف ولا قوى ؟

قلت له: دى كائن ضعيف أوى يا رب..

قاللى: طب واللى بيحاول ييجي ناحية ولادها بتعمل فيه إيه ؟

قلت له باستغراب جامد م الموضوع اللى بيكلمنى فيه: بتعمل فيه إيه.. دى بتاكله أكل

وانتظرت إن ربنا يسترسل فى الكلام لكن سكت...

وقتها بس وصلتنى الرسالة اللى كان عايز يقولهالى...

وحسيت إنى عايز الأرض تنشق وتبلعنى

لأنى إكتشفت قد إيه أنا بأكسر قلبه لما بأشك في حمايته لي..

ولما بأشك في أمانته..

ولاد ربنا مش متسابين ملطشة للظروف تعمل فيهم اللى على مزاجها

لأ.. هيه مش سايبه..

ولا هوه مولد وصاحبه غايب..

ده صاحبه موجود ومتحكم حتى في أتفه الأمور..

أوعى تخلى ظروف الناس اللى حواليك تخوفك من ربنا..

ولا تشكك في محبته وصلاحه.. مالك أنت ومال إمتحان اللى جنبك ؟!

خليك في إمتحانك أنت..

ما تقارنش إمتحان شخص بإمتحان شخص تانى

لأن كل واحد مختلف عن التانى فى حجمه وقوة إحتماله..

المهندس اللى بيصمم كوبرى بيحدد أقصى حمولة يقدر يستحملها الكوبرى..

وبيعلق يافطة لتحذير الناس: "أقصى حمولة: كذا"

ولو الحمولة تجاوزت الحد ده.. الكوبرى هايتحطم

فمن باب أولى.. المهندس البارع اللى مصممك إنت..

عارف ومحدد أقصى حمولة تقدر تتحملها ومش بيسمح لحد ولا لحاجة فوق طاقتك إنها تحطمك..

لأنك صنعة إيديه.. وغالى جدا عليه

"تأديباً إدبنى الرب وإلى الموت لم يسلمنى" (مز 118 :18)

الحياة مع ربنا ممتعة ورائعة.. مش لأن مافيهاش عواصف.. أبداً..

إوعى تصدق اللى يقول لك: "تعالى لربنا وحياتك هاتخلو من العواصف والضيقات"

ده الكتاب نفسه قال: "كثيرة هي بلايا الصديق" (مز 34 :19)

لكن إوعى تخلى إبليس يحرمك من إنك تذوق حلاوة الهدوء والسلام في وقت العاصفة..

إوعى تخليه يخبيلك باقى الآية اللى بتقول: "ومن جميعها ينجيه الرب"

من جميعها مش من شوية منها.. مهما كانت صعوبة مشكلتك..

بدل ما تقول: (يارب.. أنا عندى مشكلة كبيرة)..

قول: يامشكلة.. أنا عندى رب كبير.. قدير

"يستطيع كل شيء ولا يعسر عليه أمر" (أي 42 :2)

أصعب المشاكل قدام قدرته مالهاش قيمة خالص..

وأصغر الأمور في حياتك قدام محبته ليها قيمة كبيرة جداً ..

المهم إنك تصدق وتؤمن إن ربنا يقدر..

لأن "بدون إيمان لا يمكن إرضاؤه" (عب 11 :6)

زمان.. كنت زى الغالبية العظمى من الناس..

لكن كان في جملة بالذات كنت كل ما أسمعها أسأل نفسي:

يا ترى مين يستاهل إنى أقول له: "اللى عيشته قبل ما تشوفك عيني عمر ضايع يحسوبه إزاى علي؟؟"

لكن دلوقتى.. أنا عارف كويس جداً مين الشخص الوحيد اللى يستاهل إنى أقول له كده..

مين اللى مقابلته هيه الحياة.. مين اللى حبه لي حب حقيقى؟؟

لما الشاب بيحب شابة بيقول لها: "بحبك موت"..

وهيه كمان بتقول له: "بحبك موت"..

لكن لو سألته: "هاتشبكنى بإيه؟ .. قيراط ولا قيراطين ألماظ؟"..

تبص تلاقيه جاله مغص وهبوط حاد في الدورة الدموية ..

ويقول لها: "مامعاييش".. تقوم ترد عليه وتقول له: "يبقى ماتلزمنيش"..

أصل هوه ده الحب اللى بين البشر..

هاديلك إيه وهاخد منك إيه قصاد اللى هاديهولك !! ..

يعنى بيعه وشروه

لكن حب يسوع هو أعظم ثروة

مع تحياتي

عضو مثالي الهواية : مزاجي اليوم :

المهندس اللى بيصمم كوبرى بيحدد أقصى حمولة يقدر يستحملها الكوبرى..

وبيعلق يافطة لتحذير الناس: "أقصى حمولة: كذا"

ولو الحمولة تجاوزت الحد ده.. الكوبرى هايتحطم

فمن باب أولى.. المهندس البارع اللى مصممك إنت..

عارف ومحدد أقصى حمولة تقدر تتحملها ومش بيسمح لحد ولا لحاجة فوق طاقتك إنها تحطمك..

لأنك صنعة إيديه.. وغالى جدا عليه

خواطر جميلة جدا تسلم ايد اللى كتب

وشكرا يا دكتور على الموضوع

عضو مثالي الهواية : مزاجي اليوم :

تأمل جميل جدا

حب يسوع هو أعظم ثروة

حب ربنا لى هى غايتى هو اعظم سلاح أقاوم بة عدو الخير

هو أعظم ثروة امتلكها لانها ثروة لا تزول مهما مر الوقت

عضو مميز الهواية : مزاجي اليوم :

تأمل اكثر من رائع
وواقعي كلمة ومضومنا
نروح لمين غيره بنفكر انه سايبنا لكنه شايفنا واكتر واحد حاسس بفكر ووجع قلبنا
حاسس بفرحنا...هو المستحق والأمين.....وأقل هدية نقدمها له هي قلبنا كله وليس جزء منه
والمشاكل والأزمات ما هي موجودة موجودة بس الفيصل هو القلب اللي يستسلم وييأس
ولا القلب اللي يتحمل ويرجو ويتمسك بيسوع اللي اكيد أكيد أكيد هيخلصه منها وسريعا
"كثيرة هي اتعاب الصديقين ومن جميعهاا يخلصه الرب"
ربنا يعوضك يا دكتور